Acts 3

Bitrus N Yohanna Yi La Zabmazhi Kagna

1Nwyihoyi n wyeshe yi, Bitrus n Yohanna yi, ɓa lo aduwa zhin ngnisun na za yi. 2Vivi n aduwa nyakun yi, ɓa gye za-bmazhi shi. A ɓo ma wo lo nu nu. Cici ai ɓe n woi n abwokumin manayi ʼgbe, vivi n aduwa nyakun yi. 3Shi Bitrus n Yohanna yi ɓei duya, wa ɓa sadaka.

4Ɓa shi wo awye, Bitrus wa ciwo ge ʼshi awye ya.

5Wa gye ngye ɓaye ɓa ga wo nya ho nu.

6Amma Bitrus wa ciwo ge, “Yito nagyiwye yi lo ya gahon, Amma miɓa ga ho nyado. Dna Yesu Kristi Nazarati eye laka ha zan-zan.”

7– 8Bitrus wa shiwo bwa wa laka owo apita bwa lafiya wa gye agna. Wa zan woi gye agna. Wa kwo anyi woi ci Shekwoyi. Wa lo aduwa nyakun wa ci Shekwoyi.

9Aza gye wo dna aduwa nyakun woi zan-zan, ɓa ci Shekwoyi. 10Ɓa kpe ge wo zhin nyaɓayi nu, n wo shi abwokunmi manayi gbe cici nyi. To ɓa kpe shi kwa ze woi zan-zan m. 11Ɓa busi lo Solomon ashiragyi, aba n wo ɓo gni n Yohanna n Bitrus shibwa, ce a wo ɓa vinya ntu ɓo wo-woyi ye ɓo.

12Bitrus wa gna, “A Israilayi kniyi nu zhin cei wo fya? Fyei shi yi awye ngye ya zhin deye n yihin iko yiʼa? 13Shekwoyi Ibrahim nya, n Ishaku yi, n Yakub yi ɓedo n yi azakwoyi nyayi na zhin deye, wo la Yesu ga mwa-mwa ntu aɓeye ɓo. Yesu n fye ɓo na wo aɓo n Bilatus abye nyi kwo shi ko nyi Bilatus ɓo la ye wa lo wo ya nyi. 14Fye to ɓo ye a lo oza Gyi-gyi-yi yam, sai ʼzawuyi. 15Fye ɓo la wye-wyei Dagayi wu, ama Shekwoyi ɓo la wye-wyei gawo njesun. Yohanna n mihin yi zhin aseda da nu gama yi ɓei ku wo gye n wye-wyeyi.

16“Gaiciya ga, dna Yesu eye okwo na ka oza deye gna.

17“Fye ɓei zhin Yesu aɓe deye dna n wyegma nu elonu ofye abyeda. 18Ama anabci nu ɓo nu. Gama dole Kristi wa sin wahala ye. 19Ko bmiya fya shan bugba do, fya ɓe Dagayi aba, Fye ye abui a zhan fye ya, fye ɓa bwa agmada m Shekwoyi aba. 20Shekwoyi wo ɓa je fye tnu n fye Masihu yi. 21– 22Gama woɓa sase n ʼshe har anya vinya la kun n laifi, ɓo nu aɓo ku da n kwo-kwoyi. Musa ɓo da ge Dagayi ɓa ga fye anabi nfye mi ngye mihin, sai fya wo wo. 23Oza n wo to wo won, aɓa wu wo.

24“Samuila n Anabi yi, ɓei ku aɓe ye da nɓa zhin n anyipyei ye nyi. 25Fyei ɓedo lo nu alkawali n Shekwoyi ɓo ga Ibrahim nyi. Nge ntu na a Israila yi ɓo, anyi vinya ɓa bwa Shekwoyi anabarka. Fyehin kwa fye zhin anabi nu. 26Shi Shekwoyi ɓo ga wo abara wye-wyei n jesun wo ɓo tnu n wo yi n fye aba a Israila yi. Ntu ge wa tu fye anabarka. Wa pmi fye awye ya n fye alaifi.”